Welcome to STYLE-TIPS.COM  
FOLLOW US
 
最新推介︰
TOP
HOME > INSIDERS > 《想繼續裝傻卻又無力受折磨》
INSIDERS
 
《想繼續裝傻卻又無力受折磨》

5 months ago

#不是抽水⋯當我量地量到了外地之時,某法國化粧品牌在香港出了事。朋友著我留意這關公事件意外地演變成大眾「忽然發現」護膚化粧品都在做不人道的動物測試,因為我這數月間正密鑼緊鼓在這方面做資料搜集開展創業大計。恰巧,最初腦風暴這個點子,是跟我的好朋友M君開始的。而M君就正正於此法國化粧品牌任職。邪到呢⋯⋯

腦風暴到一個位,發現了一個問題。打個比喻:有人結婚為了愛情,也有人為了麵包;婚姻介紹所面對一個麵包型的徵婚人士,比較好辦,反正條件的事,有就deal冇就no deal,一目了然;面對一個愛情至上的,就較辣手,浪漫與不設實際,有原則與唔知想要乜,只是一線之差。正如有人創業是為了賺錢,也有人是為了夢想;我絕對理解一個「正常人」遇着我這種不識時務的夢想型創業傻瓜,真是倒大霉。M君說:「好驚啲人話做生意唔係為賺錢!」我知,我真係知!

上回講到理想有三類,A型人要出人頭地、安居樂業,即係搵錢啦。但以我的資質,想賺錢一定是打工好過(說白點係多過亦穩陣過)做生意。這年多遇過不少所謂創業人,不論是digital nomad (提倡完全不受地域限制的工作模式)、tech startup、全職投資者、自由工作者、以至slash(身兼多職/銜頭的職業定位新方向),理解到他們大多數背後的動機後,我幼稚地為反高潮的落差感到頗為失望。「我唔想再幫人打工受人氣」、「我想做老闆」、「我頂唔順朝九晚八」、「打工冇可能上到車,我想搞生意賣盤然後退休」「I wanna hack the system, work and live on my own terms」。講來講去到頭來大部份人都是賺錢行先,甚至錢還是第二,更多是自我(ego)行先,有名再有利。更不用說救世者型的偉大和小小鳥型捱得窮做自己的堅持了。

係我又傻又天真,冇米粥也好,火已透。我決定硬着頭皮幹下去(這句要加點氣勢講普通話:奸·沙·豬!)

一句到尾:所有在大陸有得賣的國際護膚化粧品牌都有做動物測試。外國品牌面對大陸跪低其實早在何小姐之前 — 當全世界正在邁向(或者已經)立例禁止動物測試時,大陸反普世價值而行法律規定進口護膚化粧品一律要進行動物測試。有幾多隻「大」牌子會放棄大陸市場呢?冇囉。

即係咁:喺好耐好耐以前,所有產品都是有機的;但現在,我們被強行default 所有嘢都是冇機,除非佢標籤自己有機(而佢冇騙你)。同樣地,我們被強行default 所有護膚化粧品都有做動物測試,除非佢標籤自己冇做(而佢亦冇取巧騙你)。更弔詭的是,有些所謂的有機認證只要成份10%有機就算達標。如果有嚿嘢在你面前,九成冇機一成有機,其實你會覺得佢係真·有機定真·冇機呢?歐洲已全面禁止動物測試,一個歐洲品牌進入大陸市場遵守中國法律進行動物測試,即是真·不人道還是被強行·不人道呢?一句到尾你買定唔買?⋯是真的難為正邪定分界,還是我們又選擇做駝鳥煩少一件事呢?

廣告一則:有興趣推動無動物測試者,尤其暑假想做些有意義的事的同學仔,誠徵洽談。請於 comment 欄查詢,謝謝!(講真㗎!)

上一則
最萌身高差情侶!香港似乎不適用?
上一則
與他共用的護膚品推介
立即按Like,追蹤STYLE-TIPS.COM 每天facebook更新!

RELATED NEWS
FOLLOW US
POPULAR POST